DAVAO CITY

Lalaki gipusil-patay sa nakamotorsiklo!

PATAY diha-diha dayon ang usa ka lalaki human gipusil sa nakamotorsiklo nga suspek sa Maco, Compostela Valley Province 5:30 gahapon sa hapon.

Giila sa kapulisan ang biktima nga si Gervin Managasa, 39 anyos ug residente sa maong lugar.

Sa imbestigasyon, nasayran nga samtang nagmotor ang biktima padulong sa Poblacion, kalit kining gitaparan sa duha ka lalaki nga nakamotorsiklo gihapon ug dayong gipusil sa makadaghang higayon.

Sa maong panghitabo, paspas nga misibat ang suspek sa wala matino nga lugar dihang natumba na ang biktima ug patay na kini.

Nakahiagom sa upat ka samad-pinusilan ang biktima sa nagkadaiyang parte sa kalawasan hinungdan sa iyang hinanaling kamatayon.

Blangko pa karon ang mga otoridad sa Maco kung unsay motibo ug kinsa ang responsable sa pagpatay sa biktima samtang padayon ang imbestigasyon sa kaso.(Angel De Vera)

3 Mananagat, sikop sa dinamita!

TANGGONG karon sa Davao del Sur PNP ang tulo ka mga mananagat human nakuhaan og upat ka dinamita sulod sa ilang bangka sa Sta.Cruz, Davao del Sur alas 2:00 gahapon sa hapon.

Ang mga dinakpan mao silang Ernesto Boganza, 42 anyos, Manuel Laso, 45 anyos ug Jodilito Argao, 49 anyos nga pulos molupyo sa Island Garden City of Samal.

Segun sa imbestigasyon, adunay mitawag sa kapulisan nga adunay mga dinamita nga dala ang tulo ka mga suspek ug sa dihang gisita nasuta nga positibo gayud ang taho.

Matud sa mga dinakpan, dili nila intensiyon ang magpabusikad sa kadagatan tungod nasayod sila nga paglapas kini sa balaud.

Kasamtangang gi-imbestigahan pa ang kaso sa Investigation Section sa Davao del Sur PNP.(Angel De Vera)

Babaye gitulis sulod sa balay, 5 mil natangag!

SOBRA ang kaguol karon sa usa ka inahan human gisulod kini sa iyang balay ug gitulis sa Soraya, Cabantian, Buhangin ning dakbayan pasado alas 9:00 sa gabii.

Matud sa biktimang si Erlinda Bariaso, 51 anyos, samtang nagtan-aw siya og TV dihang kalit nga adunay mituktok sa iyang pultahan ug iya dayong gi-ablihan.

Usa ka lalaki ang miti-on dayon og pusil ug dungan sa pagdeklara’g tulis.

Laing duha pa ka lalaki ang mikuha sa iyang pitaka nga nakabutang sa ibabaw sa TV.

Human ang panghitabo, paspas nga misibat ang mga wala mailhing suspetsado samtang daling nagpakitabang ang biktima sa iyang silingan.

Duha ka oras usab ang gihimong ronda sa mga kalalakin-an sa lugar apan pakyas silang makita ang mga kriminal.

Ang kaso anaa na sa Theft and Robbery Section sa Buhangin PNP.(Angel De Vera)

Dispatcher gitigbas sa kainom, patay!

DEAD ON ARRIVAL sa Southern Philippines Medical Center ang usa ka dispatcher human gitigbas sa kainom niini sa Purok Sto. Nino, Catalunan Grande ning dakbayan alas 9:00 sa gabii.

Ang biktima giila sa kapulisan nga si Bobby Ilagan Suatera, 37 anyos, minyo ug residente sa maong lugar.

Segun sa imbestigasyon, pauli na ang biktima sakay sa iyang bisekleta dihang gibunalan kini sa dakong kahoy sa ulo sa ngitngit nga bahin sa lugar ug didto gipusil tulo ka higayon hinungdan sa iyang hinanaling kamatayon.

Matud pa sa asawa niini, dugay na kunong nakadawat og hulga sa iyang kinabuhi ang biktima human  nalambigit sa pagpayuhot sa illegal nga droga.

Nagtuo usab ang kabanay niini nga kaila sa biktima ang mipatay kaniya.

Padayon pa ang imbestigasyon sa kapulisan aron daling masayran kung kinsa ang mga suspetsado.(Angel De Vera)

Babaye nabanggaan og multicab, angol!

ANGOL ang usa ka babaye human nabangga sa multicab samtang mitabok sa Diversion Road , Buhangin ning dakbayan pasado alas 6:00 sa gabii.

Giila sa kapulisan ang biktima nga si Genevieve Bersaminas, 28 anyos, minyo ug residente sa NHA Buhangin ning siyudad.

Sa imbestigasyon nasayran nga wala damha sa biktima ang naghaguros nga multicab ug pagtabok niini, nadasmagan siya.

Sa maong panghitabo, nawad-an og panimuot ang biktima human nagkadugo ug naka-angkon og bun-og sa nagkadaiyang parte sa kalawasan.

Gilayong gidala sa balay-tambalanan ang biktima aron matambalan samtang mitahan usab sa iyang kaugalingon ang driver sa multicab nga nailhang si Emerson Deliatela.(Angel De Vera)

16 Anyos sikop sa pagpangawat !

NAGTINGKAGOL karon sulod sa presohan ang usa ka batan-on human nasakpan nga nanikwat og bag sa usa ka babaye sa dalang Quirino ning dakbayan alas 10:00 gahapon sa buntag.

Ang dinakpan mao si alyas Joyvin, molupyo sa Piapi, Boulevard ning siyudad.

Matud sa biktimang si Girlie Salceda, 24 anyos, igo lamang siya milabay sa grupo sa suspek sa maong lugar ug paglapas niini, kalit na lamang gi-ilog sa dinakpan ang iyang bag ug misutoy pagdagan.

Daling nakatawag og pulis ang biktima diin nakorner gayud sa dalang Ponciano ang suspek.

Gilayong gidala sa San Pedro PNP ang suspetsado aron ma-imbestigahan.

Ang biktima ang dili na lamang mopasaka og kaso apan gusto niini nga makostudiya ang maong suspek sa DSWD alang sa usa ka counseling.(Angel De Vera)

Kawatan gipusil, patay!

DEAD ON THE SPOT ang usa ka batan-on nga gituohang kawatan human kini gipusil-patay sa  wala mailhing suspetsado alas 7:45 Biyernes sa gabii diha sa Purok Villaluz, Barangay Duterte, Agdao, Davao.

Si PO3 Dionisio, imbestigador sa Sta. Ana Police Station nagkanayon nga ang biktima mao si Alfred Oppus Valles, 17 anyos, ulitawo ug nagpuyo sa nahisgutang lugar.

Sumala pa niini, samtang ang biktima migawas sa ilang balay ug nagmaneho sa iyang bisekleta padulong sa naasoy’ng dapit, usa ka wala mailhing lalaki ang kalit lang miduol  kaniya ug sa  walay daghang pangutana gilayong mipusil gamit ang wala masutang kalibre sa armas ngadto sa biktima igo sa iyang ulo ug namatay.

Human sa pagmusil, gilayong miresponde ang Scene of the Crime Operatives(SOCO) nga gipanguhan ni PO2 Cubillan ug gideklarang wala nay kinabuhi ang biktima samtang ang suspetsado ang yano lang misibat padulong sa  wala matinong direksiyon.

Narekober sa SOCO ang pipila ka mga nilikit nga pinaugang dahon sa Marijuana gikan sa bulsa sa suspek.

Dugang niini, ang biktima bag-uhay pa lang nakagawas gikan sa presohan sa Sta. Ana PNP tungod sa kasong pagpangawat ug gumikan kay menor-de-edad gipagawas kini.

Sa kasamtangan, gipailawom na sa makuting imbestigasyon sa kapulisan aron masuta kung unsa ang tinuod nga motibo sa krimen lakip na ang pag-ila ug pag-aresto sa mamumuno.(Roger G. Abelo)

Lalaki gitabangan og kulata, kritikal!

NAKIGTIGI karon sa kamatayon sulod sa Southern Philippines Medical Center (SPMC)ang usa ka lalaki nga gitabangan og kulata sa  wala mailhing mga suspetsado ala 1:45 gahapon sa kadlawon diha sa Roxas Aveñue, dakbayan sa Davao.

Ang biktima nailhan sa kapulisan sa ‘alyas’ nga Jerry, anaa sa 40 hangtod 45 ang  panuigon ug nagpuyo sa nahisgutang lugar.

Base sa entry blotter sa Sta. Ana PNP, nadiskubrehan na lang kini sa mga residente sa lugar nga nagbuy-od ug naligo sa kaugalingong dugo daplin sa karsada sa naasoy’ng dapit.

Nasuta sa mirespondeng 911 ambulance nga adunay dakong samad sa ulo ug bun-og sa nagkadaiyang kalawasan sa dihang gitabangan og kulata ang biktima pinaagi sa pagbunal og bato sa ulo sa pipila ka mga batan-on  hinungdan nga gideklarang kritikal ang kondisyon.

Anaa na sa investigation section sa buhatan sa Sta. Ana PNP ang maong kaso ug padayon kining giimbestigahan.(Roger G. Abelo)

Minor gidunggab og botelya sa CVO!

GISUTA pa karon sa Talomo Police Station kung kinsa ang sakop sa Civilian Volunteer Organization (CVO) ang miluba gamit ang botelya ngadto sa  biktima, alas 12:30 gahapon sa kadlawon diha sa Bonguyan Beach Resort, Barangay 76-A.

Giila ang biktima nga si Mark Sardido, 17 anyos ug residente sa Tulip drive, Matina ning siyudad sa Davao.

Gi-asoy sa wala nagpailang igsuon niini nga nag-inom lang ang biktima sa nasangpit nga resort kuyog ang iyang mga higala.

Apan, natripan sila sa pikas grupo hinungdan nga gipanglabay sila og botelya ug ang biktima maoy nakulatahan pag-ayo nga miresulta sa paglanding niini sa hospital.

Gidugang pa sa igsuon nga usa matud pa ka sakop sa CVO ang mibunal ug midunggab sa nahisgutang biktima.

Nag-iyahay na og sibat ang mga suspek padulong sa  wala matinong direksiyon samtang ang biktima ang gilayong gihatod sa balay-tambalanan.

Hinuon, wala nay angayang kabalak-an ang pamilya ug kabanay niini tungod luwas na kini sa talandugong kahimtang.(Roger G. Abelo)

CAGAYAN de ORO

NAGDUWA’G BARAHA GIPUSIL, 2 PATAY

GIPAMUSIL sa wala pa mailhing armadong grupo ang tulo ka mga lalaki samtang nagduwa matod pa og baraha sa V. Castro street, Carmen, Cagayan de Oro.

Si Inspector Jonathan Gere, deputy commander sa Carmen police station 4 (PS4) nahinabi sa Brigada News nagkanayon nga kalit lang gipangluthang alas 10:50, Biyernes sa gabii ang mga biktima nga giilang sila si Rex Villareal, 14; Abelio Generalao, 54 ug Rico Alebio, 29, miyembro sa Batang Mindanao (BM29) gang.

Matod sa report una nang gidala ngadto sa J.R. Borja General Hospital ang mga biktima, apan gideklarang patay si Villareal. Samtang si Alebio, wala abti pipila ka minutos nakabsan usab sa iyang kinabuhi human makaangkon og samad pinusilan sa iyang ulo.

Kasamtangan ang usa ka biktima nagpabilin pa sa balay tambalanan, apan gikabutyag nga anaa sa makuyawng kahimtang human mapusilan sa tiyan.

Gituohan sa mga otoridad nga si Alebio maoy puntirya sa mga suspek nga giingong miyembro sa grupong ‘vigilantes’ ug naangin lamang ang menor de edad nga biktima ug kauban niini.

Narekober sa crime scene ang tulo ka basiyo sa punto 45 kalibre nga pusil nga gituohang gigamit sa mga suspek nga sakay sa Honda XRM, kolor blue nga walay plate number. Dave Montera

3 lalaki nakuhaa’g ‘shabu’ sikop

SIKOP sa mga otoridad ang tulo ka mga lalaki nga namalit matod pa og gituohang ‘shabu’ sa Barangay 31, Cagayan de Oro.

Giila ni Senior Inspector Buenaventura Reyes Jr., Station commander sa Cogon police station 2 (PS2) ang mga dinakpan nga sila si Teodoro Abarquez, 28; Herbert Brazas, 30 ug Nelson Serato, pulos molupyo sa Barangay Balulang ning siyudad.

Asoy ni Reyes sa pakighinabi sa Brigada News nga alas 10:00 sa gabii, Biyernes ilang nasiplatan ang mga suspek atol sa ilang pagpangronda kauban ang mga tanod nga namalit og gidiling droga sa menor de edad nga mga lalaki.

“Posibleng gigamit lang kining mga menor de edad sa mga drug dealer,” butyag ni Reyes.

Nakuha gikan sa posisyon sa mga suspek ang tulo ka sachet sa gituohang shabu.

Paglapas sa Republic Act 9165 ang kasong atubangon sa mga suspek samtang nagtingkahol sa Maharlika detention cell. Dave Montera

Mga bata, gigamit sa big-time dealer sa droga

DAKO ang pagtuo sa kapolisan nga gigamit lamang sa mga ‘big-time’ dealer sa iligal nga droga ang mga bata kon menor de edad nga runner sa pagpamaligya sa dakbayan sa Cagayan de Oro.

Sa pakighinabi sa Brigada News ni Senior Inspector Buenaventura Reyes, Jr., hepe sa kapolisan sa Cogon nagbutyag nga aduna gayud dakong grupo nga nagpaluyo sa maong matang sa kalihokan, partikular na sa Barangay 31, ning siyudad.

“Mao pa nang atong sutaon pag-ayo. Mitago ra na sa maong lugar,” butyag ni Reyes.

Matod niya posibleng mga anak ra usab sa mga dealer ang namaligya og shabu aron dili mahibaw-an sa mga otoridad. Gawas niini, dili usab mahimong kasohan ang mga menor de edad.

Dugtong niini gipalig-on pa sa mga otoridad ang hugot nga kampanya batok sa paghitak sa gidiling droga sa dakbayan. FBD

‘Karnaper’ sapon sa akto

GIDAKOP sa mga otoridad ang usa ka lalaki nga nasapon sa akto sa tag-iya nga nangarnap sa iyang motorsiklo sa Capistrano street-Kalambagohan, Cagayan de Oro.

Si PO1 Joan Galvez nahinabi sa Brigada News nagkanayon nga mga ala 1:30 sa miaging hapon nadakpan ang suspek nga giilang si Templo Sultan, 25, minyo, lumad sa dakbayan sa Marawi.

Matod ni Galvez, narekober gikan sa posisyon sa suspek ang usa ka Honda XRM 110 nga motorsiklo, nga adunay plate number MG-7542, diin gipanag-iyahan sa usa ka Eleuterio Desoyo, 49, minyo sa Upper Tambo, Macasandig, ning siyudad.

Dugang ni Galvez ugmang adlawa pormal nang kasohan ang suspetsado. FBD

6 wanted person sa Agusan mitahan

BOLUNTARYONG mitahan sa ilang kaugalingon ngadto sa mga otoridad ang unom ka mga wanted person sa kasong pagpangawat didto sa Agusan del Norte.

Nasayran atubangan ni Police Inspector Joannes Castro, hepe sa Magallanes Municipal Police Station mitahan ang mga suspek nga nailhang sila si Jennifer, Zacharias ug Perfecto Bustillo; Ernesto Acero ug Benjie Buron, nga pulos lumad sa nasampit nga probinsya.

Matod ni Castro una nang gipagawas sa korte ang warrant of arrest sa mga suspek nga gilagdaan ni Judge Emmanuel Escatron sa regional trial court (RTC) branch 2, siyudad sa Butuan.

Asoy niya magpabilin sulod sa bilanggoan ang mga suspek hangtod dili makahatag sa ilang piyansa nga 28 mil hantod 48 mil pesos.

Police Round-Up

Ni Dave Montera

Mga ‘student gang’ sa Butuan gibungkag

MAPASALAMATON ang principal sa Libertad National High School (LNHS) sa pagbungkag sa siyam ka mga grupo sa giingong ‘student gang’ sa Barangay Libertad, siyudad sa Butuan.

Nasayran dugay nang gireklamo sa mga ginikanan ang paglambigit sa ilang mga anak ngadto sa maong grupo nga nagdala lamang ngadto sa kalautan.

Pinangulohan sa kapitan sa Libertad nga si Vincent Rosario nabungkag gayud ang maong grupo ug subling gipahimangnoan ang mga ginikanan nga bantayan gayud pag-ayo ang ilang mga anak aron dili mahitumpawak sa pagamit og gidiling droga hatod sa pagsalmot niining mga ‘gang.’

Kahibaloan ubay-ubay na ka mga insidente sa maong tunghaan kung asa gikalambigitan sa nagkalain-laing grupo sa mga tinun-an. FBD

Asawa nakigbulag sa bana, giluba

NADUNGGABAN gyud sa bana ang iyang asawa nga nakigbuwag matod pa kaniya atol sa ilang panaglalis didto sa Sinaloc, El Salvador, Misamis Oriental, Biyernes sa gabii.

Samaran nga gihatod ngadto sa Northern Mindanao Medical Center (NMMC) sa Cagayan de Oro ang biktima nga giilang si Rosalinda (tinuod pangalan gipugngan), 36, lumad sa maong dapit.

Sa imbestigasyon sa El Salvador Municipal police station nasayrang kalit lang giluba sa hubog nga suspetsado nga si alyas Rosalio, ang biktima nga nagdumili na nga makig-uli ngadto kaniya.

Nakaangkon og samad dinunggaban sa dughan ang biktima nga padayong gitambalan sa balay tambalanan.

Samtang ang suspek nasikop gilayon sa kapolisan ug gikatakdang kasohan.

Babaye gihulgang patyon sa kapuyo

GIBATI og tumang kahadlok ang usa ka babaye human matod pa gihulgang patyon sa iyang kapuyo sa Barangay Lapasan, siyudad sa Cagayan de Oro.

Midangop sa Agora police station 3 (PS3) ang biktima nga giilang si alyas Ailenn (tinuod pangalan gipugngan), 26, adunay kapuyo sa maong dapit.

Sa inisyal nga imbestigasyon sa mga otoridad, gi-asoy sa biktima nga nakadawat kini og mensahe sa cellphone gikan sa suspek nga si alyas Roy, hinungdan nga dili tiaw ang iyang kahadlok.

Gikan sa bangko, gilabnihan

GILABNIHAN og tag-10 mil pesos nga cellphone ang usa ka babaye human niya og sulod sa usa ka bangko sa Osmeña street, siyudad sa Cagayan de Oro.

Sa imbestigasyon sa Cogon police station 2 (PS2) giila ang biktima nga si Giselle Espinosa, 26, dalaga sa Barangay Macasandig ning siyudad.

Matod sa mga otoridad, gibutyag sa biktima nga mga alas 2:00 sa hapon, Biyernes, nakugang gyud siya dihang iyang nadiskubrehan nga abli na ang iyang bag ug nahanaw ang iyang cellphone.

Sakyanan nakaparada sa ‘carwash’ gikawatan

NATANGAG gyud sa mga suspek ang duha ka baterya sa usa ka sakyanan samtang nakaparada kini sa usa ka ‘carwash’ sa Barangay Nazareth, Cagayan de Oro.

Nasayran nagbalor og kapin 5 mil pesos ang mga baterya nga gikawat sa suspek gikan sa sakyanan sa wala pa mailhing tag-iya.

Mismo ang tigbantay sa maong ‘carwash’ nga si Rodel Jamodiong, 36, maoy nagpatabang ngadto sa Macasandig police station 9 (PS9) alas 8:00 miaging adlaw.

200 pamilya mihikling sa engkwentro

SURIGAO DEL SUR- MOKABAT sa 200 ka pamilya ang mihiklin gikan sa ilang mga panimalay aron malikay  nga maangin sa panag-engkwentro tali sa mga sundalo ug rebeldeng New Peoples Army(NPA) sa Marihatag, Surigao del Sur province.

Matud pa sa Marihatag Disaster Coordinating Council, kinatibuk-ang  234 ka pamilya o mokabat  sa  1,125  ka residente sa Barangay Mahaba ang mibiya sa ilang panimalay tungod sa nasangpit nga kagubot.

Samtang, gipailawom sa municipal government ang  Barangay Mahaba sa  state of calamity.

Ang namakwit nga mga residente ang gidala sa  municipal gym ug gihatagan usab sa ilang panginahanglanon.

Matud sa mga otoridad, duha ka sundalo ug usa ka babayeng miyembro sa  rebeldeng grupo ang napatay sa insedente.

Usa pa ka sibilyan ug dugang tulo ka sundalo ang gikareport nga samaron. Joe Reyes