HUGOT nga gipanghimakak sa mga tag-as nga opisyal sa National Food Authority sa Davao Region ang pasangil ni Presidente Benigno Aquino III nga nangadugta na ang mga NFA rice sa nasud.
Migawas ang taho atol sa pamahayag sa unang State of Nation Address ni Presidente Aquino III niadtong nakalabay’ng adlaw nga nagpataka nalang og import ug bugas ang nahisgutang ahensiya hinungdan nga nangadugta na lang kini sa mga bodega panahon sa Administrasyon ni kanhing Presidente Arroyo.
Ang mga opisyal sa NFA Davao, nagkanayon nga igo-igo lang ang ilang gi-import nga mga bugas alang sa gikinahanglan sa mga katawhan.
Giklaro sa NFA nga lig-on ang ilang gihimong lakang sa pag control sa pag-import og bugas aron dili kini mausik sanglit gitagana kini panahon nga adunay moabot nga mga kalamidad.
Hinuon, gipasalig niini nga ilang gipaningkamutan nga masilbihan sa matarong ang mga katawhan.(Roger G. Abelo)