KRITIKAL ang kahimtang sa usa ka lalaki human gipusil sa Brgy. Cabantian, Buhangin alas 7:00 sa gabii.
Giila sa kapulisan ang biktima nga si Ian Perez Lopez, 39 anyos, minyo nga taga Emily Homes Subdivision, Cabantian, Buhangin.
Segun sa imbestigasyon, igo lamang mibantay ang biktima sa ilang tindahan dihang kalit mi-abot ang duha ka wala mailhing suspetsado ug dayong gipusil kini nga naigo sa wala nga bahin sa iyang kiliran.
Sa pagreponde sa Buhangin PNP, nakarekober kini og usa ka slug ug basyo sa bala sa kalibre .45 nga pistola nga gituohang maoy gigamit sa pagpamusil sa biktima.
Human ang insedente, paspas nga misibat ang mga suspek pagawas sa maong subdivision samtang ang biktima daling gidala sa balay-tambalanan.
Padayon pa ang imbestigasyon sa Buhangin PNP aron masuta ang motibo sa maong krimen.(Angel De Vera)