“ALTHOUGH we do it every election and in driver’s license renewal, but I still support the idea.”
Kini ang mensahe nga gidangat ni Rep. Bambi Emano sa 2nd District sa Misamis Oriental sa pakighinabi sa Brigda News kabahin sa gilaraw nga voluntary drug testing sa mga kongresista.
Magboluntaryo na lamang matod pang mopailawom ang mga kongresista sa drug examination aron pamatud-an nga dili tanan kanila ang nagagamit og gidiling droga.
Nasakitan matod pa ang pipila ka mga kongresista sa mga batikos kanila gumikan nadakpan ang usa sa ilang mga miyembro nadamay na ang tanan.
Pagpasabot ni Emano, dili lamang mga magbabalaod ang angay mopailawom sa drug testing apan tanang mga opisyal sa gobiyerno.
Giluwatan ang maong lakang human masikop si Ilocos Sur Rep. Ronald Singson sa Hong Kong nga adunay dalang gidiling droga.
Mahinumdoman sa nakalabayng adlaw, mipailawom sa drug testing si Senate Majority Leader Tito Sotto ug gidasig niini ang sama niyang senador. FBD