GI-ULO pagpusil sa duha ka wa pa mailhing mga suspetsado ang usa ka lalaki nga miyembro sa ‘Baklid Gang,’ ang grupo sa mga suspetsadong mangunguot ug mga manglabnihay sa dakbayan sa Cagayan de Oro, gahapon.
Giila ni Inspector Nelsidaca Villanueva sa scene of the crime operatives (SOCO) ang biktima nga si Cres Sony Crispo, 38, adunay kapuyo sa Bontong, Camaman-an, ning siyudad.
Matod ni Villanueva sa Brigada News, nakaangkon og samad sa luyo nga bahin sa dalunggan ang biktima nga miresulta sa iyang kamatayon alas 10:45 sa buntag sa Pinikitan Street, Camaman-an.
Narekober sa crime scene ang usa ka basiyo sa .45 kalibre nga pusil nga gituohang gigamit sa mga suspek nga sakay sa Honda XRM, kolor itum nga motorsiklo ug walay plate number.
Si PO3 Nolasco Gaabucayan, imbestigador sa Cogon police station 2 (PS2) nahinabi sa Brigada News nagkanayon nga posibling kontra nga grupo ang nihimo sa pagpusil sa biktima.
“Aduna man gud grupo nga ilang kontra [Baklid Gang]. Pareho aning grupo sa mga drayber kay mao maning sagad nilang gabiktimahon,” butyag ni Gaabucayan.
Gikompirmar usab niini nga gawas sulod na sa ilang selda ang biktima gumikan sa kasong pagpanglabni ug pagpangawat sa mga de pasaherong sakyanan.
Gikabutyag nga adunay pending warrant of arrest ang biktima sa kasong 9165 kon illegal drugs, apan gipanghimakak kini ni Juvy nga iyang live-in partner. FBD