PATAY ang duha ka mga tinun-an sa elementarya human mahugno ang ilang tunghaan didto sa probinsiya sa Lanao del Norte, gahapon sa hapon.
Sa inisyal nga imbestigasyon sa kapolisan, gibutyag ni PO2 Junald Morales, duty officer sa Lanao del Norte Provincial Police Office gumikan sa kusog nga pagbundak sa ulan, dungan ang makusog nga hangin nahugno mga alas 2:40 sa hapon ang Gabaldon Building sa Sapad Central School sa Purok 2, Poblacion, lungsod sa Sapad sa maong probinsiya.
Giila ang mga namatay nga sila si Cherry Mae Rama, grade 6 pupil ug Junard Quilalang, grade 4 pupil, pulos nagatungha sa nasampit nga tunghaan.
Si Morales nga nahinabi sa Brigada News nagbutyag nga gawas sa mga namatay, ubay-ubay pa ang samaran nga pabilin pang nagpa-alim sa Kapatagan Provincial Hospital.
Matod sa mga magtutudlo kalit lamang nahugno ang nasampit nga old building nga gikamatay sa mga biktima samtang nagsilong lamang sa stage sa naasoyng gambalay.
Dugang asoy ni Morales mihimo na og igong aksiyon ang mga kadagkuan sa maong tunghaan kabahin sa maong problema. FBD