GI-AKUSAHAN karon sa pipila ka mga molupyo sa dakbayan sa Heneral Santos ang kapulisan ilawom sa liderato ni General Felicisimo Khu nga gihimong gatasan ang operasyon kontra illegal nga sugal nga last-2.
Kahinumdoman nga daghan na karon ang mi-alma sa pipila ka mga manindahay ug negosyante sa merkado publiko sa dakbayan sa estilo sa pipila ka mga miyembro sa kapulisan sa rehiyon 12 sa gihimo niining “hulidap” ngadto kanila diin kwarta lamang ang kuha-on.
Una nang mipalag kaniadtong milabay’ng semana ang pipila ka mga nagpautang sa palengke, manindahay ug newspaper ingon man sidewalk vendors tungod nagpataka na lamang og dakop ang mga nagpailang intelligence operatives sa kapulisan ngadto sa mga sibilyan basta nagdala og listahan, gilayon kining dakpon ug aregluhon.
Sa pamahayag nilang alyas Frank ug Juliet, pulos negosyante sa palengke, “kutob lamang sa mga gagmay ang ilang ginadakop ug dili pa gyud tinuod.”
Una nang gi-akusahan kaniadto sa mga molupyo sa dakbayan si General Khu nga “anti-poor” tungod sa iyang kampanya kontra last-2 nga wala man gani hatagi og solusyon ang dugay nang problema sa nagkataas nga “Unemployment Rate”.
Matud sa usa ka dinakpang usher sa dihang nahitabi sa Brigada, “unsa ang ilang gusto namong himuon, mangawat mi o mamaligya mi og droga para lang mabuhi among pamilya? Kami man lang ang ilang kaya, naa bitaw mga binayrang mamamatay-tao nga armado dili man nila kayang dakpon.”(EMIR BARIQUIT)