SUBLING gipaklaro ni City Councilor Virginia Llido ang nahimong pagbatikos sa iyang gihuptang tulo ka mga komitiba sa Sangguniang Panlungsod.
Sa pamahayag niini sa 89.5 Brigada FM giangkon sa konsehal nga sakit alang kaniya nga akusahan ug kwestiyunon sa iyang abilidad nga makahupot sa tulo ka mga komite.
Nasakitan si Llido sa pagkwestiyon sa iyang mga kaubanan sa konseho sa paghupot niini sa tulo ka mga komitiba sa bag-ong 16th Sangguniang Panlungsod sama sa Committee on Labor, Committee on Tourism ug Committee on Cooperatives.
Sa unang pakighinabi sa Brigada News Philippines kang Vice-Mayor Shirlyn Nograles, kini nagkanayon nga adunay ubang konsehal ang naghupot sa sobrang mga komite samtang ang mga anaa sa oposisyon ang walay gihuptan bisan usa na lamang kabuok komite.
Matud Llido, dili siya Superhero nga duphan ang tanang mga problema sa katawhan, apan maningkamot siya nga matubag ang pipila ka mga problema nga moabot sa iyang gipanghuptan nga komitiba.
Gikalipay usab niini ang paghatag og pagsalig kaniya sa mga kaubanang konsehal tungod sa pagtuong mapalambo niya ang siyudad kung hisgutan ang turismo pinaagi sa pagtinabangay tali nilang mga konsehal ug mayor sa siyudad.
“ Bakit nila kwestiyonin ‘yong aking abilidad, hindi sa paramihan ng komitiba yan, kung hindi sa pagtutulungan para sa kapakanan ng taong bayan, kahit wala kang komitiba kung bukal sa loob mong tumulong may magagawa ka sa ating bayan, ano bang kaya nila na hindi ko kaya, may alam sila na hindi ko alam at may alam din ako na hindi nila alam,” matud ni Llido. (EMIR BARIQUIT)