PATAY na nga naabtan sa mga anak si Maristela Achivar human giluba sa iyang kapuyo.
Ang biktima ang duguan nga nakita ug nagluko sa tiilan nga bahin sa kama nga gipailawman sa TV set sulod sa iyang kwarto.
Gitabunan sa mga sanina ug habol ang patay’ng lawas ni Achivar nga ilado sa iyang mga higala ug mga kabanay sa tawag nga Bebing.
Sumala pa sa mga silingan sa biktima, duha lamang sila sa iyang kapuyo nga si Aquino Bobongan, sa ilang gi-abangan nga balay sa Purok 5 Lanton, Apopong ning siyudad sa Heneral Santos.
Selos sa suspek ang gituohang hinungdan nganong gipatay niini ang biktima.
Matud sa mga silingan, nadungog nila ang panag-away tali sa duha Martes sa buntag una nakita ang biktima nga patay na.
Nangayo pa og tabang ang mga silingan ngadto sa Purok Chairman kabahin sa kagubot sa maglive-in.
Dugang pa sa silingan nga nadungog nila gikan sa biktima ang gipamulong ni Bebeng nga, “patyon jud ko nimo lab” ug pipila ka higayon miungol na kini ug nahilom na ang sulod sa balay.
Midalikyat ang Chairman ngadto sa panimalay sa anak ni Maristela aron nga susihon sa pamasin nga adunay nahitabo nga dili maayo tungod migawas ang suspek dala ang usa ka bag.
Sa pagsusi sa anak sa balay wala kini nakit-an mao nga milakaw na lamang.
Adlaw’ng Miyerkules nakurat na lamang ang mga silingan sa dihang nadiskubrehan nga patay na si Maristela.
Nakahiagom og unom ka mga samad-dinunggaban si Maristela sa nagkadaiyang bahin sa iyang lawas.
Gituohan nga 24 oras na nga patay ang biktima apan mga otoridad nakakita og preskong dugo sa crime scene.
Nakuha sa Scene of the Crime Operatives (SOCO-12) gikan sa crime scene ang gunting ug usa ka sulat gikan sa suspetsadong si Bobongan. (Roland Ortillano)