Sa 35 minutos nga State of the Nation Address (SONA) ni Pangulong Benigno Aquino III, katunga niini gigasto sa pagbutyag sa mga anomaliya sa nakalabay’ng administrasyon susama sa dyutay’ng nasudnong badyet nga nahabilin. Sa 1.5 trillion pesos nga gahin alang sa 2010, 994 bilyon pesos na ang nagasto. Ang nahabilin nga mokapin sa 500 bilyon pesos kuhaan pa ug 300 bilyon pesos alang sa automatic appropriation. Ang nahabilin maoy standing balance nga pagagamiton gikan sa Hulyo hangtod na sa Disyembre karong tuiga. Dyutay nalang ang nahabilin alang sa mga programa nga planong ipatuman ni P-Noy.Ang kaluoy mao kitang mga katawhang Pilipino.
Gawas niini, gibulgar usab sa Presidente ang sobra sobrang mga prebelihiyo sa mga empleyado sa Metro Manila Sewerage System (MWSS) nga kung buot isipon, daghan na untang mga Pilipino ang nakabenepisyo. Ang naghinubrang pag-angkat og bugas nga miresulta sa pagkadaut. Sa gihimong pagsusi sa mga bodega sa National Food Authority, libuan ka mga sako sa NFA rice ang dili na mapahimuslan kay nangabulok na ug gipang-ulod na samtang minilyon ka mga Pilipino ang gipang-gutom tungod kay wala nay maka-on. Usa kini ka pag-usik usik sa kwarta sa gobyerno. Duna silay tulubagon ngadto sa mga tawo bisan pa kung mo-ingon sila nga subay sa inter-agency ang rekomendasyon sa pag-angkat sa mga bukas. Gumikan sa ilang kahadlok nga mabisto ang ilang sayop nga projection, gipasagdan nalang nga mangadaut ang mga bugas. Unta gipanghatag nalang kini ngadto sa mga tawong gipang-gutom, dako pa unta kining tabang sa nagkutoy nilang mga tiyan.
Ang nakapait pa gayud, hangtod karon padayon nga nag-abot ang mga imported rice. Para asa? Nga kung isipon, nangadaut na gani ang mga nahiunang importasyon.Usa pa, apektado kaayo ang atong mga mag-uuma tungod mobarato ang presyo sa ilang mga abot.
Angayan gayud nga ipursige sa kasamtangang administrasyon ang imbestigasyon kalabot ning maong mga anomaliya. Dapat molihok ang Kongreso nga solusyonan kining maong problema ug malikayan ang dili ensaktong pag-gasto sa kwarta sa gobyerno. Kinahanglan nga adunay balaud nga mapasar nga mag-kontrola sama sa monthly o quarterly release aron dili basta-basta mapagawas o mahilabtan ang kaban sa gobyerno.