HUMAN gihatagan og tagal hangtod Agosto 9,2010 nga paulion sa tagsa-tagsa ka mga nasud ang mga langyaw’ng trabahante sa Iraq, lakip ang libuan ka mga OFW nanawagan sila og tabang sa gobyerno.
Nasayran nga nagpagawas og memorandum ang United States Central Command niadtong Hulyo 20 kung asa gibutyag ni Colonel Richard Nolan, senior contracting officer sa Iraq CentCom Contracting Command : “All contractors in Iraq have 20 days from the date of this letter to ensure their employees comply with US and international law and understood their redeployment responsibilities under the term of their contract.”
Dugang sa memorandum : “It is the contractor’s responsibility to ensure that it is not employing people from countries prohibited from entry to Iraq.”
Ang desisyon sa US Central Command ang namugna human sa report nga pipila ka mga expatriate workers lakip mga Filipino ang gi-abandona sa ilang contractors sa nagkadaiyang kampo sa Iraq hinungdan nga nabalaka nga gilapas sa mga contractors ang daghang patakaran lakip ang pagkuha og mga trabahante gikan sa mga nasud nga nagpatuman og deployment ban.
Ang Pilipinas ug Nepal ang pipila sa mga nasud nga gibungat diin ang kaliwat nakasulod ug nakatrabaho sa Iraq luyo sa travel ban nga gipatuman sa mga host governments.
Gibutyag nga ang mga Filipino worker sa Iraq mikita og average nga $800 kada bulan.
Matud sa labor department, mokabat sa 10 mil ang mga Filipino nga nagtrabaho sa Iraq sukad sa mi-aging tuig.
Apan, gibutyag sa Iraq’s Charge D’Affaires Adel Mawlood Hamoudi al-Hakimh nga misaka pa ang ihap ngadto sa 15,000.