GIBULABOG sa grassfire ang runway sa Lumbia International Airport sa dakbayan sa Cagayan de Oro, Lunes sa hapon.
Matud ni SFO1 Victor Naybe, imbestigador sa City Fire Station, alas 4:12 sa hapon ilang girespondihan ang insedente diin gilamoy sa kalayo ang kaging nga mga sagbot sa runway sa maong airport.
Nabalaka gayud ang mga pasahero lakip na ang mga piloto sa kalit lamang nga mag-ulbo sa kalayo.
Sa pakigsusi sa mga personahe sa Bureau of Fire Protection (BFP) gituohan nga ang tumang kainit sa panahon maoy hinungdan sa grassfire.
Dugtong pa ni Naybe, sa wala pa mahitabo ang grassfire sa airport, nahitabo usab ang grassfire sa kasagbotang bahin sa Gran Europa, Lumbia ning siyudad ala 1:00 sa hapon.
Hinuon walay gikatalang samaran o naangin sa maong hitabo. FBD