NAGLAOM si Atty. Reynato Magbutay, Regional Director sa Commission on Elections (Comelec-10) nga magmalampuson ug magmalinawon gihapon ang piliay ning tuiga, nunot sa kabalaka sa power crisis.
Si Magbutay nga nahinabi sa mga tigbalita atol sa press conference sa Unity Fun Run sa Camp Alagar namahayag nga aduna silay standby battery sa ilang precinct count optical scan (PCOS) machine nga molungtad sa 16 ka oras.
Gipasabot sa opisyal nga andam usab sila makigtigom sa mga kadagkoan sa National Power Corporation (Napocor) aron hisgutan ang mga lakang alang sa kalampusan sa piliay ning tuiga.
Matud niya magsugod ang piliay sa alas 7:00 sa buntag hangtod alas 6:00 sa hapon, hayan makasustiner gayud ang baterya sa ilang mga PCOS.
Dugtong niini, gidugang ni Magbutay nga wala pa nahidangat ang mga PCOS nga pagagamiton sa Northern Mindanao sa pagkakaron. FBD

==