DUHA ka mga hamtong nga babaye ang gipangsikop sa mga otoridad human malambigit sa giingong extra service sa usa ka ‘Spa’ sa dakbayan sa Cagayan de Oro.
Si PSSupt. Antonio Montalba, deputy director sa Cagayan de Oro City Police Office (Cocpo) nga maoy nangulo sa operasyon namahayag nga magpadayon ang ilang kampanya batok niining mga Spa nga nitanyag og extra service sa unodnong kalipay sa ilang mga kostumer.
Nasayran sa kantidad nga 1, 800 pesos isip entrance sa maong spa mahimo nang motagay og kalipay ang ilang mga kostumer nga lalaki ngadto sa di-numerong mga babaye.
“Magpili lang ka unya ila dayon ihatag ug mahimo na nimong i-outing,” asoy ni Montalba.
Gani aduna pa kuno’y aquarium ang maong spa nga dili isda ang sulod, inay klase-klaseng mga babaye.
Butyag pang Montalba nga ila usab sutaon kung adunay business permit ang nasangpit nga establishemento. FBD