GUMIKAN sa problema sa asawa, giputol sa bana ang kaugalingong kinatawo sa Barangay Consolacion, siyudad sa Cagayan de Oro, Lunes sa gabii.
Nitugpa sa Northern Mindanao Medical Center (NMMC), ang biktimang gitago lamang sa pangalang Jamiver, 34, minyo sa susamang barangay alas 7:00 sa gabii.
Sumala sa report, dugay na kunong nagproblema sa iyang asawa ang biktima gumikan wala na siya gipadulog matag gabii ug gidid-an na kunong makighilawas sa asawa.
Ang asawa sa biktima nga nahinabi sa mga tigbalita nagbutyag nga walay trabaho ang iyang bana ug aduna matud pay diperensiya sa pangutok.
“Kanang panghitabo wala ko diha,” butyag sa asawa.
Napuok matud pa ang pagputol sa kinatawo sa iyang bana, gamit ang blade.
“Unsaon naman nato nga wala naman…wala man gud nadala,” dugtong niya.
Dihang naputol na kuno ang kinatawo sa iyang bana, iyang gilabay ang kaputol niini ilawom sa katre.
Giangkon usab sa asawa nga wala na niya gitugotang makighilawas ang iyang bana sanglit wala pa kini trabaho.
“Akong gipangutana nganong iyang giputol, motubag  lang man siya nga dunay tawo buot mopatay kaniya,” butyag pa sa 33 anyos nga asawa.
Ang biktima pabilin pang nagpa-alim sa NMMC human maabis ang iyang kinatawo. FBD/Romer R. Mediana