TULO na ang ihap sa mga nakabsan sa kinabuhi human ang aksidente sa dalan gahapon sa kadlawon diha sa national highway Lanoy, Calumpang, General Santos City.
Giimbestigahan pa sa Traffic Control Division ang kaso sa ‘head on collision’ nga gikalambigitan sa  duha ka habal-habal diin pabiling buhi ang usa sa mga biktima ug gipangita pa ang laing usa.
Ang mga namatay ang giilang sila Jorvel Papelleras, 23 anyos drayber sa motorsiklo nga adunay plaka numero OD 9244 ug molupyo sa 39.2 Barangay Fatima ning siyudad.
Ikaduhang patay mao si  Richard Singson, 21 anyos sa Barangay Fatima lamang gihapon.
Ikatulong patay mao si  Rensey Juanico, drayber sa walay plaka nga motosiklo nga nadala pa sa General Santos Hospital apan nakabsan sa iyang hinulamang kinabuhi human ang pipila ka oras.
Sumala pa sa iyaan ni Jorvel nga si Imelda Cabinbin, kinsa nabalian sa tuo nga bahin sa iyang tiil nga padulong lamang sila sa siyudad aron mamalengke sa dihang gisugat sila sa nag-ikis nga dagan sa motorsiklo nga gisakyan sa tulo ka lalaki.
Patay on the spot si Jorvel  u gang angkas ni Juanico nga wala na nadala sa balay tambalanan.
Dakong kasubo karun ang nadangatan sa inahan ni Jorvel nga si Ruth kalabot sa disgrasya nga nadangatan sa iyang anak ug igsoon. (ROLAND ORTILLANO)