TUNGA sa adlaw kung sumahon ang upat ka tagi-tagi nga brownout nga tagtulo ka oras sa usa ka adlaw.
Kini ang gibutyag mismo sa South Cotabato Electric Cooperative (SOCOTECO) 2 pinaagi ni Engr. Bong Sotelo, labaw sa Technical Services Dept sa nahisgutang electric cooperative.
Gikumpirma usab ni Sotelo nga sa ulahing advisory sa National Grid Corporation of the Philippines, mikunhod pa sa 650 megawatts ang kakulangon sa supply sa tibuok Mindanao hinungdan nga gihatagan lamang sila sa 50.9  megawatts luyo nga ang kinahanglang supply sa mga services areas sa Socoteco 2 mokabat sa 104 megawatts.
Kini matud pa ang hinungdan nganong masinatian ang 12 ka oras nga rotational brownout sa mga lugar nga giserbisyuhan sa Socoteco 2.
Gikabutyag nga nasinatian ang kakulang sa supply sa kuryente tungod gamay lang usab ang magenerate nga kuryente gikan sa mga sources sa Mindanao.
Kini tungod gihapon sa epekto sa hulaw nga nagpaubos sa water level sa mga kasapaan sa Mindanao nga gikuhaan og generation sa hydropower plants.