NANAWAGAN karon si Malungon incumbent councilor ug vice - mayoralty candidate Erwin Asgapo ngadto sa iyang katagi-lungsod nga magmaisugong barugan ang hinlo ug malinawong eleksIyon karong Mayo 10.
Sa usa ka pakighinabi, si Asgapo nagpadayag nga kayang matapna ang unsa mang election-related violence nga posibleng mahitabo sa Malungon kung magpaka-bidyilante ang katawhan.
Ang apela ni Asgapo nanukad sa sumala pa pagpanganti ni incumbent Malungon Mayor Reynaldo Constantino nga i-“Ampatuan” (ekspresyong nagatumbok kang Maguindanao Governor Andal Ampatuan Sr., kansa gitudlong utok sa Maguindanao Massacre), ang si kinsa mang pamilya nga dili mosuporta kaniya ug sa kaalyadong si People’s Champ Movement (PCM) congressional candidate Manny Pacquiao.
“Aduna’y kausa nahubog si mayor (Constantino) diha sa Malungon, bag-o lang. Niingon siya, kining nagkalaban sa akoa nga mga pamilya ilabi na sa pamilya ni Ampon ug Asgapo, kining mga tawhana ni gakalaban sa akoa sa pulitika, ilaha kong pakaulawan kay pareng Manny (Pacquiao), himuon ko ni silang Ampatuan.”
“Ang matag estorya niya kung aduna siya’y mahibal-an nga lider nga moboto og Asgapo, moboto’g Padernilla, moboto’g Chiongbian, ang iyang isulti sa mga kapitan ug mga lider, indi niyo ko pagpahuy-i kay pareng Manny. Maayo ba na siya? Dili dapat ni ang estorya sa usa ka lider,” si Asgapo nagbutyag.
Dungan niini, gitug-an ni Asgapo nga hilabihan usab matud pa ang kasuko ni Constantino kaniya tungod sa iyang pagpapili isip bise-mayor ilawom sa bandong Sarangani Reformation and Reconciliation Organization (SARRO).
Si Asgapo maoy running-mate ni SARRO Mayoralty candidate Teody Padernilla.
“Tinuod na siya, suko gyud siya nganong nidagan ko’g bise mayor sa Malungon ilabi na dinhi nila Chiongbian, Dominguez, Solon nga partido ug grupo.”
“Ang atong nasud demokrasya. Wala siya’y katungod nga masuko sa ako kay ako magpapili isip bise-mayor sa Malungon,” segun ni Asgapo.
Si Asgapo maoy kanhi hugot nga kaalyado ni Constantino sa pulitika niadtong 2004 election.
Karon, gisaway ni Asgapo ang pag-angkon ni Constantino nga aduna kini paghigugma sa mga tribo sa Malungon.
“Gikan sa Malandag, paingon sa Datal Batong, Bo. Blaan, Malabod, gina-angkon niya nga siya ang lider diha labi na sa tribung B’laan. Dinhi dapit sa Tamban, Lutay, paingon Upper, Lower, paingon San Juan, Lomabat, Panamin, kining mga barangay, ikumpara daw nimo didto sa iyang area nga gina-angkon niya nga siya ang lider sa tribu ug unsa dinhi sa amoa. Aduna ba dinhi sa amoa marijuana, kawat, bandido, ambush, wanted?…25% ra nga dugong Blaan ang galatay sa iyang (Constantino) dugo. Ang among pamilya sukad kaniadto pa maoy gapakamatay alang sa ka-tribuhan,” matud pa niya.
Si Erwin Asgapo maoy anak ni kanhing barangay captain Benjamin Asgapo nga nailhang loyal supporter sa mga Chiongbian sukad pa sa sinugdanan. (J. Romares)