NAILHAN na ang suspetsadong drayber nga responsabli sa pagpanigbas sa duha ka magsuon sa Corner Gemilina-Agoho drive, Carmen, siyudad sa Cagayan de Oro sa niaging hapon.
Si Chief Inspector Michael John Deloso, hepe sa Carmen police station 4 (PS4) nga nahinabi sa Brigada News nag-ila sa biktima nga mao si Carlito
Saturno, 27, ulitawo, kinsa gideklarang patay sa mga mananambal sa J.R. Borja Memorial General Hospital.
Ang manghod sa biktima nga giilang si Joselito Saturno, 22,  ulitawo nga pulos molupyo sa Barangay Patag ning siyudad ang nakaangkon og samad tinigbasan sa walang pulso ug naputol matod pa ang mga ugat niini.
Sa inisyal nga imbestigasyon, gisaysay ni Deloso nga alas 3:00 sa hapon niadtong Domingo ila gilayong girespondihan ang crime scene, apan pakyas nga masikop ang suspek nga nailhang si alyas Kenneth, hingkod ang edad sa wa matinong dapit.
Nasayran una nang gikalalis ni Joselito ang suspek nga usa matod pa ka traysikad drayber ug dihang nakita sa maguwang iyang gitabangan ang iyang manghod.
“Kining suspek, nadakpan na nato ni. Balik-balik na gani na dinhi sa atong istasyon,” asoy ni Deloso.
Sa pagkakaron matod ni Deloso ilang gitugyan ngadto sa city intelligence and detection unit (CIDU) ang dugang pagpanubay sa kaso. FBD/Romer R. Mediana