GIKUMPIRMAR ni Senior Inspector Rafael Roxas, team leader sa Scene of the Crime Operatives (SOCO), nga patay nang napalgan sa iyang kabanay ang usa ka ginang sulod sa iyang gi-abangang balay sa V. Castro Street, Carmen, siyudad sa Cagayan de Oro gahapon sa buntag.
Si Roxas nga nahinabi sa Brigada News nag-ila sa biktima nga mao si Morie Ebana Flores, hingkod ang edad, minyo ug temporaryong molupyo sa maong dapit.
“Walang nakakaalam kung anong trabaho ng biktima kahit ‘yung distant relative niya na tinanong natin,” asoy ni Roxas.
Sa pakigsusi sa mga otoridad, walay nakit-ang samad o foul play sa lawas sa biktima.
Base sa impormasyong nadawat adunay gihambin nga balatian ang biktima nga Hepatitis B ug posible nga kini ang hinungdan sa iyang kamatayon.
“Pero sa ngayon, hindi pa natin masabi yan,” dugtong ni Roxas.
Gipahimangnuan na lamang sa SOCO  ang kabanay sa biktima nga ipailawom sa otopsiya ang patay’ng lawas sa biktima aron masuta ang tinuoray nga hinungdan sa kamatayon niiini. FBD