GIDAKDAKAN og bato sa ulo hangtod namatay ang usa ka mag-uuma nga nagpunay matud pa og sungog ngadto sa iyang silingan sa Sitio Langag, Dansolihon, siyudad sa Cagayan de Oro sa niaging adlaw.
Sa pamahayag ni SPO2 Elmar Patindol sa Lumbia police station 8 (PS8) giila ang biktima nga si Isidro Sabelo, 51, minyo, lumad sa Sitio Balawon, Talakag, Bukidnon.
“Naulit na kuno ang iyang kauban sa inom [suspek] sa sige niini og sungog nga usa siya ka netibo, mao tong nikuha siyag bato,” asoy ni Patindol sa pakighinabi sa Brigada News.
Una nang nag-inom ang biktima ug ang suspek nga giilang si Felix Delante, 34, minyo sa samang dapit alas 11:00 sa gabii niadtong Sabado ug pagka-alas 5:00 sa kadlawon niadtong Domingo nadiskubrehan na lamang sa kabanay nga patay na ang biktima.
Si Patindol nagkanayon, patay on the spot ang biktima ug gideritso na lamang kini sa lokal nga punerarya ning siyudad gahapon.
Nasayran nga buak gyud ang ulo sa biktima human kini gi-ayo pagdakdak og bato sa suspetsado nga nasuko kaniya.
Duha ka higayong gidakdakan og bato sa ulo sa suspek ang biktima hinungdan sa hinanali niining kamatayon.
Ang suspek nagtingkagol sa Lumbia City Jail, samtang padayong giimbestigahan sa mga otoridad ang motibo sa krimen. FBD