GIHAGIT ni kanhing S/Supt Cesar ” BOY ‘ Mancao ang kanhing PNP chief ug Senator Panfilo Lacson nga mobalik na sa Pilipinas ug atubangon ang silot sa balaod human kini nalambigit sa Dacer-Corbito double murder case.
Gideklara ni Mancao nga klarong sad-an gayod si Lacson gumikan kay hangtod karong higayona nagpabiling wala pa mibalik sa nasud.
Kini bisan pa man nga milapas na ang deadline sa iyang official ug travel permit nga giaprobahan usab ni Senate president Juan Ponce Enrile.
Matud ni Mancao, sa gihimo ni Lacson, kini nagpakita lang nga ang usa ka tawong sad-an mahadlok atubangon ang kamatuoran.
Dili na gayud matud pa mausab ng iyang pagbarog sa kamatuoran gumikan kay anaa ang kagawasan ug mahatagan usab sa klarong hustisya ang mga kabanay sa biktima.
Kahinumdoman nga migawas na ang arrest warrant batok kang Senator Panfilo Lacson sa nakalabay’ng adlaw sa  kasong Dacer-Corbito double murder case.
Gisugdan na usab ang pagpangita kang Senator Panfilo Lacson kinsa gituohang mitago lamang sa Hongkong.
Si Mancao ang midagan karon sa posisyon congressman sa 1st  District sa COMVAL province (DRL)