GIPRESENTA gahapong adlawa ni B/Gen. Rey Ardo, Commanding Officer  sa 103rd Brigade, Philippine Army atubangan sa media ang usa ka Yemen national nga gibuhian sa iyang mga abductors alas 12:30 sa hapon.
Matud ni Ardo, unang nakigkita ang mga abductors kang Cong. Faysah Dumarpa sa unang distrito sa Lanao del Norte.
Diha-diha nakig-alayon ang opisyal ngadto sa kasundalohan nga miresulta sa pagbuhi kang Najibal Arl Odaini, usa ka Yemen national nga gidagit niadto pang Enero 29,2010 sa Barangay Matampay, siyudad sa Marawi.
Sa pakighinabi sa mga tigbalita, si Ardo niingon nga gihingusgan sa armadong kusog sa Pilipinas ang ‘no ransom policy’ sa mga kidnap victims.
Matud niya, ang biktima usa lamang sa mga miyembro sa grupo nga mihatod og tabang pinaagi sa ilang misyon nga gitawag nga ‘charitable project’ ngadto sa mga residente sa Lanao del Sur.
Si Ardo nagbutyag nga gibuhian sa wala pa mailhing grupo ang biktima sa utlanang bahin sa Tagoloan, Lanao del Sur ug lungsod sa Talakag, Bukidnon.
Nagpadayon pa ang pagsuhid sa mga otoridad sa grupo nga midagit sa biktima.
Si Ardo nagbutyag nga base sa inisyal nilang pakigsusi, nangayo og usa ka milyon dolyares ang mga suspetsado bugti sa pagbuhi sa nasangpit nga Yemen national. Nagsul-ob og uniporme sa sundalo ang matud pa responsable sa pagdagit sa maong langyaw.
“With my appeal, dun sila na touch, na may puwang pala ang puso nila na maka-Diyos…wala akong dala sa totoo lang,” tipik sa pamahyag ni Cong. Dumarpa. FBD