NAGSUGOD na ang “operation baklas” sa Commission on Elections (Comelec) sa mga advance political materials sa mga pulitiko sa nagkadaiyang bahin sa nasud.
Gahapon sa kadlawon pipila ka team ang gipalihok ni National Capital Region (NCR) Election Director Atty. Michael Dioneda sa pipila ka suok sa Metro Manila aron tangtangon ang mga poster sa mga kandidato nga  wala mituman sa patakaran sa Comelec.
Subay  sa campaign rules and regulations sa  komisyon, adunay ibutang nga common poster areas aron butangan sa mga campaign materials sa mga kandidato aron dili kini magkatag katag sa pampubliko ug pribadong lugar ug aron malikayan ang bandalismo.
Bisan ang sukod sa mga poster ug airtime sa mga pulitiko sa radio ug telebisyon apil na sa mga ads sa mantalaan ang bantayan usab sa Comelec.
Kahibaluan nga pormal nang nagsugod ning adlawa ang pormal nga pagpangampanya sa national positions.