Brigada News

Mga ‘student gang’ sa Butuan gibungkag

brigz_jb — Sat, 04 Sep 2010 14:59:33 +0000

MAPASALAMATON ang principal sa Libertad National High School (LNHS) sa pagbungkag sa siyam ka mga grupo sa giingong ‘student gang’ sa Barangay Libertad, siyudad sa Butuan.
Nasayran dugay nang gireklamo sa mga ginikanan ang paglambigit sa ilang mga anak ngadto sa maong grupo nga nagdala lamang ngadto sa kalautan.
Pinangulohan sa kapitan sa Libertad nga si Vincent Rosario nabungkag gayud ang maong grupo ug subling gipahimangnoan ang mga ginikanan nga bantayan gayud pag-ayo ang ilang mga anak aron dili mahitumpawak sa pagamit og gidiling droga hatod sa pagsalmot niining mga ‘gang.’
Kahibaloan ubay-ubay na ka mga insidente sa maong tunghaan kung asa gikalambigitan sa nagkalain-laing grupo sa mga tinun-an. FBD

Asawa nakigbulag sa bana, giluba

brigz_jb — Sat, 04 Sep 2010 14:59:07 +0000

NADUNGGABAN gyud sa bana ang iyang asawa nga nakigbuwag matod pa kaniya atol sa ilang panaglalis didto sa Sinaloc, El Salvador, Misamis Oriental, Biyernes sa gabii.
Samaran nga gihatod ngadto sa Northern Mindanao Medical Center (NMMC) sa Cagayan de Oro ang biktima nga giilang si Rosalinda (tinuod pangalan gipugngan), 36, lumad sa maong dapit.
Sa imbestigasyon sa El Salvador Municipal police station nasayrang kalit lang giluba sa hubog nga suspetsado nga si alyas Rosalio, ang biktima nga nagdumili na nga makig-uli ngadto kaniya.
Nakaangkon og samad dinunggaban sa dughan ang biktima nga padayong gitambalan sa balay tambalanan.
Samtang ang suspek nasikop gilayon sa kapolisan ug gikatakdang kasohan.

‘Karnaper’ sapon sa akto

brigz_jb — Sat, 04 Sep 2010 14:58:19 +0000

GIDAKOP sa mga otoridad ang usa ka lalaki nga nasapon sa akto sa tag-iya nga nangarnap sa iyang motorsiklo sa Capistrano street-Kalambagohan, Cagayan de Oro.
Si PO1 Joan Galvez nahinabi sa Brigada News nagkanayon nga mga ala 1:30 sa miaging hapon nadakpan ang suspek nga giilang si Templo Sultan, 25, minyo, lumad sa dakbayan sa Marawi.
Matod ni Galvez, narekober gikan sa posisyon sa suspek ang usa ka Honda XRM 110 nga motorsiklo, nga adunay plate number MG-7542, diin gipanag-iyahan sa usa ka Eleuterio Desoyo, 49, minyo sa Upper Tambo, Macasandig, ning siyudad.
Dugang ni Galvez ugmang adlawa pormal nang kasohan ang suspetsado. FBD

NAGDUWA’G BARAHA GIPUSIL, 2 PATAY

brigz_jb — Sat, 04 Sep 2010 14:58:03 +0000

GIPAMUSIL sa wala pa mailhing armadong grupo ang tulo ka mga lalaki samtang nagduwa matod pa og baraha sa V. Castro street, Carmen, Cagayan de Oro.
Si Inspector Jonathan Gere, deputy commander sa Carmen police station 4 (PS4) nahinabi sa Brigada News nagkanayon nga kalit lang gipangluthang alas 10:50, Biyernes sa gabii ang mga biktima nga giilang sila si Rex Villareal, 14; Abelio Generalao, 54 ug Rico Alebio, 29, miyembro sa Batang Mindanao (BM29) gang.
Matod sa report una nang gidala ngadto sa J.R. Borja General Hospital ang mga biktima, apan gideklarang patay si Villareal. Samtang si Alebio, wala abti pipila ka minutos nakabsan usab sa iyang kinabuhi human makaangkon og samad pinusilan sa iyang ulo.
Kasamtangan ang usa ka biktima nagpabilin pa sa balay tambalanan, apan gikabutyag nga anaa sa makuyawng kahimtang human mapusilan sa tiyan.
Gituohan sa mga otoridad nga si Alebio maoy puntirya sa mga suspek nga giingong miyembro sa grupong ‘vigilantes’ ug naangin lamang ang menor de edad nga biktima ug kauban niini.
Narekober sa crime scene ang tulo ka basiyo sa punto 45 kalibre nga pusil nga gituohang gigamit sa mga suspek nga sakay sa Honda XRM, kolor blue nga walay plate number. Dave Montera

3 lalaki nakuhaa’g ‘shabu’ sikop

brigz_jb — Sat, 04 Sep 2010 14:57:42 +0000

SIKOP sa mga otoridad ang tulo ka mga lalaki nga namalit matod pa og gituohang ‘shabu’ sa Barangay 31, Cagayan de Oro.
Giila ni Senior Inspector Buenaventura Reyes Jr., Station commander sa Cogon police station 2 (PS2) ang mga dinakpan nga sila si Teodoro Abarquez, 28; Herbert Brazas, 30 ug Nelson Serato, pulos molupyo sa Barangay Balulang ning siyudad.
Asoy ni Reyes sa pakighinabi sa Brigada News nga alas 10:00 sa gabii, Biyernes ilang nasiplatan ang mga suspek atol sa ilang pagpangronda kauban ang mga tanod nga namalit og gidiling droga sa menor de edad nga mga lalaki.
“Posibleng gigamit lang kining mga menor de edad sa mga drug dealer,” butyag ni Reyes.
Nakuha gikan sa posisyon sa mga suspek ang tulo ka sachet sa gituohang shabu.
Paglapas sa Republic Act 9165 ang kasong atubangon sa mga suspek samtang nagtingkahol sa Maharlika detention cell. Dave Montera

Minor gidunggab og botelya sa CVO!

brigz_jb — Sat, 04 Sep 2010 12:33:18 +0000

GISUTA pa karon sa Talomo Police Station kung kinsa ang sakop sa Civilian Volunteer Organization (CVO) ang miluba gamit ang botelya ngadto sa biktima, alas 12:30 gahapon sa kadlawon diha sa Bonguyan Beach Resort, Barangay 76-A.

Giila ang biktima nga si Mark Sardido, 17 anyos ug residente sa Tulip drive, Matina ning siyudad sa Davao.

Gi-asoy sa wala nagpailang igsuon niini nga nag-inom lang ang biktima sa nasangpit nga resort kuyog ang iyang mga higala.

Apan, natripan sila sa pikas grupo hinungdan nga gipanglabay sila og botelya ug ang biktima maoy nakulatahan pag-ayo nga miresulta sa paglanding niini sa hospital.

Gidugang pa sa igsuon nga usa matud pa ka sakop sa CVO ang mibunal ug midunggab sa nahisgutang biktima.

Nag-iyahay na og sibat ang mga suspek padulong sa wala matinong direksiyon samtang ang biktima ang gilayong gihatod sa balay-tambalanan.

Hinuon, wala nay angayang kabalak-an ang pamilya ug kabanay niini tungod luwas na kini sa talandugong kahimtang.(Roger G. Abelo)

Lalaki gipusil-patay sa nakamotorsiklo!

brigz_jb — Sat, 04 Sep 2010 12:32:28 +0000

PATAY diha-diha dayon ang usa ka lalaki human gipusil sa nakamotorsiklo nga suspek sa Maco, Compostela Valley Province 5:30 gahapon sa hapon.

Giila sa kapulisan ang biktima nga si Gervin Managasa, 39 anyos ug residente sa maong lugar.

Sa imbestigasyon, nasayran nga samtang nagmotor ang biktima padulong sa Poblacion, kalit kining gitaparan sa duha ka lalaki nga nakamotorsiklo gihapon ug dayong gipusil sa makadaghang higayon.

Sa maong panghitabo, paspas nga misibat ang suspek sa wala matino nga lugar dihang natumba na ang biktima ug patay na kini.

Nakahiagom sa upat ka samad-pinusilan ang biktima sa nagkadaiyang parte sa kalawasan hinungdan sa iyang hinanaling kamatayon.

Blangko pa karon ang mga otoridad sa Maco kung unsay motibo ug kinsa ang responsable sa pagpatay sa biktima samtang padayon ang imbestigasyon sa kaso.(Angel De Vera)

Kawatan gipusil, patay!

brigz_jb — Sat, 04 Sep 2010 12:32:15 +0000

DEAD ON THE SPOT ang usa ka batan-on nga gituohang kawatan human kini gipusil-patay sa wala mailhing suspetsado alas 7:45 Biyernes sa gabii diha sa Purok Villaluz, Barangay Duterte, Agdao, Davao.

Si PO3 Dionisio, imbestigador sa Sta. Ana Police Station nagkanayon nga ang biktima mao si Alfred Oppus Valles, 17 anyos, ulitawo ug nagpuyo sa nahisgutang lugar.

Sumala pa niini, samtang ang biktima migawas sa ilang balay ug nagmaneho sa iyang bisekleta padulong sa naasoy’ng dapit, usa ka wala mailhing lalaki ang kalit lang miduol kaniya ug sa walay daghang pangutana gilayong mipusil gamit ang wala masutang kalibre sa armas ngadto sa biktima igo sa iyang ulo ug namatay.

Human sa pagmusil, gilayong miresponde ang Scene of the Crime Operatives(SOCO) nga gipanguhan ni PO2 Cubillan ug gideklarang wala nay kinabuhi ang biktima samtang ang suspetsado ang yano lang misibat padulong sa wala matinong direksiyon.

Narekober sa SOCO ang pipila ka mga nilikit nga pinaugang dahon sa Marijuana gikan sa bulsa sa suspek.

Dugang niini, ang biktima bag-uhay pa lang nakagawas gikan sa presohan sa Sta. Ana PNP tungod sa kasong pagpangawat ug gumikan kay menor-de-edad gipagawas kini.

Sa kasamtangan, gipailawom na sa makuting imbestigasyon sa kapulisan aron masuta kung unsa ang tinuod nga motibo sa krimen lakip na ang pag-ila ug pag-aresto sa mamumuno.(Roger G. Abelo)

Dispatcher gitigbas sa kainom, patay!

brigz_jb — Sat, 04 Sep 2010 12:31:56 +0000

DEAD ON ARRIVAL sa Southern Philippines Medical Center ang usa ka dispatcher human gitigbas sa kainom niini sa Purok Sto. Nino, Catalunan Grande ning dakbayan alas 9:00 sa gabii.

Ang biktima giila sa kapulisan nga si Bobby Ilagan Suatera, 37 anyos, minyo ug residente sa maong lugar.

Segun sa imbestigasyon, pauli na ang biktima sakay sa iyang bisekleta dihang gibunalan kini sa dakong kahoy sa ulo sa ngitngit nga bahin sa lugar ug didto gipusil tulo ka higayon hinungdan sa iyang hinanaling kamatayon.

Matud pa sa asawa niini, dugay na kunong nakadawat og hulga sa iyang kinabuhi ang biktima human nalambigit sa pagpayuhot sa illegal nga droga.

Nagtuo usab ang kabanay niini nga kaila sa biktima ang mipatay kaniya.

Padayon pa ang imbestigasyon sa kapulisan aron daling masayran kung kinsa ang mga suspetsado.(Angel De Vera)

Top 10 sa Nursing Exam, gipasidungan sa SP

brigz_jb — Sat, 04 Sep 2010 12:30:50 +0000

GIPRESENTA sa Sangguniang Panlungsod atol sa ika-siyam nga session sa konseho ang upat ka mga bag-ong nurse sa dakbayan sa Heneral Santos nga malampusong nakasulod sa Top 10 sa Nursing Licensure Examination (NLE) kaniadtong milabay’ng adlaw.

Ang upat, gipresenta pinaagi ni Kagawad Margareth Rose Santos, chairperson sa Education Committee, aron magsilbing inspirasyon sa uban nga maningkamot sa ilang pagtungha aron makapasa sa eksamin ug makatabang sa ilang ginikanan ug katilingban.

Ang upat gilangkuban nilang Alice Joana Toledo, third placer; Joey Ann Asierto Tan, 7th placer; Laurice Ester Gamboa, 8th placer ug ang 9th placer nga si John Roland Casinto Pumuceno.

Samtang, ang usa wala mapresenta tungod gihikutar pa ang papeles niini alang sa oath-taking ceremony sunod bulan. (Roland Ortillano)